ការសិក្សាឆ្នាំមូលដ្ឋាន
សាកលវិទ្យាល័យត្រូវបានទទួលស្គាល់ដោយរាជរដ្ឋាភិបាលនៃព្រះរាជាណាចក្រកម្ពុជា តាម អនុក្រឹត្យលេខ ១១១ អនក្រ.បក
ចុះថ្ងៃទី២៤ ខែតុលា ឆ្នាំ២០០៦
ដោយទទួលស្គាល់សាកលវិទ្យាល័យភ្នំពេញអន្តរជាតិ អក្សរកាត់ ស.ភ.ព.អ ជាអក្សរឡាតាំង “Phnom Penh International University” អក្សរកាត់ “PPIU” ស្ថិតក្រោមឱវាទរបស់ក្រសួង អប់រំ យុវជន និង កីឡា។
ដេប៉ាតឺម៉ង់ថ្នាក់ឆ្នាំសិក្សាមូលដ្ឋាននៃសាកលវិទ្យាល័យភ្នំពេញអន្តរជាតិត្រូវបានទទួលស្គាល់ដោយក្រសួងអប់រំ យុវជន និងកីឡា តាមប្រកាសលេខ ១៦៨ អយកប្រក ចុះថ្ងៃទី ០២ ខែ កុម្ភៈ ឆ្នាំ២០០៦។
ដើម្បីធានាបាននូវនិរន្តរភាពក្នុងការបណ្តុះបណ្តាល ដេប៉ាតឺម៉ង់ថ្នាក់ឆ្នាំសិក្សាមូលដ្ឋានបានបង្កើតផែនការ យុទ្ធសាស្ត្រដោយអនុលោមតាមផែនការមេរបស់សាកលវិទ្យាល័យ។
I. ផែនការយុទ្ធសាស្ត្រឆ្នាំសិក្សា ២០១២-២០១៥
១. ទស្សនៈវិស័យ
ផ្តល់នូវចំណេះដឹងជាមូលដ្ឋានដល់និស្សិតក្នុងវិស័យទាំង ០៤ គឺ៖
១- គណិតសាស្រ្ត វិទ្យាសាស្រ្ត និងកុំព្យូទ័រវិទ្យា
២- សិល្បៈ និងមនុស្សសាស្ត្រ
៣- វិទ្យាសាស្ត្រសង្គម
៤- ភាសាវិទ្យា
មុខវិជ្ជាតម្រង់ទិសព្រមទាំងការចូលរួមអនុវត្តផ្ទាល់ក្នុងការងារសង្គម ដូចជាការសិក្សាពីច្បាប់ចរាចរផ្លូវ គោក ផលប៉ះពាល់នៃការប្រើប្រាស់គ្រឿងញៀន ជម្ងឺអេដស៍ ប្រវត្តិសាស្ត្រខ្មែរក្រហម។ល។ ដើម្បីឲ្យ និស្សិតមាន សមត្ថភាព គ្រប់គ្រាន់បន្តការសិក្សាជំនាញនៅគ្រប់គ្រឹះស្ថានឧត្តមសិក្សាក្នុងប្រទេសកម្ពុជា។
២. បេសកកម្ម
ដើម្បីឲ្យនិស្សិតថ្នាក់ឆ្នាំសិក្សាមូលដ្ឋានទាំងអស់ទទួលបាននូវចំណេះដឹងគ្រឹះ និងតម្រង់ ទិសដល់និស្សិតគ្រប់ៗ រូបប្រកបដោយគុណភាព គុណធម៌ និងសមភាពតាមរយៈ៖
- ការរៀបចំហេដ្ឋារចនាសម្ព័ន្ធសំភារៈរូបវ័ន្តគ្រប់គ្រាន់ និងទំនើបកម្មតាមនិយាម គរុកោសល្យ
- ការរៀបចំកម្មវិធីសិក្សាទំនើបដែលគ្របដណ្តប់លើវិស័យទាំង ៤ និងតម្រង់ទិសតាមជំនាញ
- ការជ្រើសរើសសាស្រ្តាចារ្យមានគរុកោសល្យក្នុងការផ្ទេរនូវចំណេះដឹងដល់និស្សិត
- ការផ្តល់សេវាកម្មប្រកបដោយគុណធម៌ និងសមធម៌
- ការពង្រើកសហប្រតិបត្តិការជាតិ និងអន្តរជាតិ
៣. គោលដៅ
- ផ្តល់ចំណេះដឹងប្រកបដោយគុណភាព និងប្រសិទ្ធភាពខ្ពស់។
- អភិវឌ្ឍកម្មវិធីសិក្សាឲ្យស្របតាមការណែនាំរបស់គណៈកម្មាធិការទទួលស្គាល់គុណភាពអប់រំនៃកម្ពុជា និង ក្រសួងអប់រំ យុវជន និងកីឡា។
- ជ្រើសរើស និងរក្សាទុកនូវសាស្ត្រាចារ្យដែលមានសមត្ថភាព បទពិសោធន៍ និងទេពកោសល្យខ្ពស់។
- អភិវឌ្ឍ និងធ្វើទំនើបកម្មលើមូលដ្ឋានហេដ្ឋារចនាសម្ព័ន្ធរូបវ័ន្ត។
៤. វត្ថុបំណង
ផ្អែកលើលទ្ធផលសម្រេចបានក្នុងឆ្នាំសិក្សា២០១១-២០១២ ហេដ្ឋារចនាសម្ព័ន្ធរូបវ័ន្ត និងធនធានមនុស្ស ដេប៉ាតឺម៉ង់ថ្នាក់ឆ្នាំសិក្សាមូលដ្ឋាននឹងសម្រេចឲ្យបាននូវការបណ្តុះបណ្តាលទាំង បរិមាណ និងគុណភាពរយៈ ពេលបីឆ្នាំខាងមុខ (២០១២-២០១៣ ២០១៣-២០១៤ និង២០១៤-២០១៥) ចំនួន ៨២៨៤នាក់។ ចំនួននេះ នឹងកើនឡើង ២០% នៃឆ្នាំសិក្សា២០១១-២០១២ (១៨៩៧) ដូចខាងក្រោម៖
- ២០១២-២០១៣ ចំនួន ២២៧៦ នាក់
- ២០១៣-២០១៤ ចំនួន ២៧៣១ នាក់
- ២០១៤-២០១៥ ចំនួន ៣២៧៧ នាក់
៥. ផែនការសកម្មភាព
ដើម្បីសម្រេចបេសកកម្ម គោលដៅ និងវត្ថុបំណងនៃផែនការយុទ្ធសាស្ត្រខាងលើ ដេប៉ាតឺម៉ង់ថ្នាក់ឆ្នាំសិក្សា មូលដ្ឋាន នៃសាកលវិទ្យាល័យភ្នំពេញអន្តរជាតិត្រូវអនុវត្តសកម្មភាពដូចខាងក្រោម ៖
- ផ្សព្វផ្សាយព័ត៌មានស្តីពីការចុះឈ្មោះចូលសិក្សាថ្នាក់ឆ្នាំសិក្សាមូលដ្ឋាននៃឆ្នាំសិក្សា ២០១៤-២០១៥។
- ផ្សព្វផ្សាយកម្មវិធីសិក្សាថ្នាក់ឆ្នាំសិក្សាមូលដ្ឋានជូននិស្សិត។
- ពង្រឹងវិន័យ និងត្រួតពិនិត្យជាប្រចាំលើសកម្មភាពរៀន និងបង្រៀនរបស់និស្សិត និងសាស្ត្រាចារ្យឲ្យស្របតាមកម្មវិធីសិក្សា ដែលបានយល់ព្រមដោយគណៈកម្មាធិការទទួលស្គាល់គុណភាពអប់រំនៃ កម្ពុជា។
- បន្តរៀបចំសិក្ខាសាលាជាប្រចាំស្តីអំពី ការគោរពនិងអនុវត្តច្បាប់ចរាចរ សមភាពយែនឌ័រ ការជៀសវាងគ្រឿងញៀន និងអំពើអបាយមុខផ្សេងៗ ។ល។
- ផ្សព្វផ្សាយឲ្យបានទូលំទូលាយនូវកម្មវិធីសិក្សាថ្នាក់ឆ្នាំសិក្សាមូលដ្ឋានតាមរយៈមធ្យោបាយ និងបណ្តាញសារ ព័ត៌មាន។
- ជំរុញ និងណែនាំឲ្យនិស្សិតធ្វើស្វ័យសិក្សា និងស្រាវជ្រាវជាបុគ្គល ឬ ជាក្រុម។
- រៀបចំកម្មសិក្សាសម្រាប់និស្សិតដើម្បីទទួលបានបទពិសោធជាក់ស្តែង។
- ជំរុញការចូលរួមរបស់សាស្ត្រាចារ្យក្នុងការស្រាវជ្រាវពិភាក្សា ដកពិសោធន៍ ដើម្បីអភិវឌ្ឍកម្មវិធីសិក្សា។
- ពង្រីក និងធ្វើទំនើបកម្មហេដ្ឋារចនាសម្ព័ន្ធ សម្ភារៈរូបវ័ន្ត សម្ភារៈបច្ចេកទេស សម្ភារៈឧបទ្ទេស។
- អភិវឌ្ឍធនធានសាស្ត្រាចារ្យ។
- បន្តអនុវត្តការវាយតម្លៃសាស្ត្រាចារ្យ បុគ្គលិក និងនិស្សិតជាប្រចាំ។
- បន្តរក្សា និងពង្រើកទំនាក់ទំនងជាមួយសមាគមន៍គ្រឹះស្ថានឧត្តមសិក្សា សមាគមន៍អាជីវកម្ម និងភ្នាក់ ងារឯកជននាៗទាំងក្នុង និងក្រៅប្រទេស។
សេចក្តីពិស្តារនៃផែនការសកម្មភាពខាងលើនេះមាននៅក្នុងឧបសម្ព័ន្ធទី១។
៦. កត្តាដែលធ្វើអោយផែនការយុទ្ធសាស្ត្រទទួលជោគជ័យ
ផែនការយុទ្ធសាស្ត្រថ្នាក់ឆ្នាំសិក្សាមូលដ្ឋាននឹងទទួលបានជោគជ័យដោយសារកត្តាដូចខាងក្រោម៖
ក. ការងារទំនាក់ទំនង និងសហប្រតិបត្តិការ
១. ស្ថាប័នក្នុងប្រទេស
- ក្រសួងអប់រំ យុវជន និងកីឡា៖ បំពេញរាល់លក្ខខ័ណ្ឌរបស់ក្រសួងអប់រំ យុវជន និងកីឡា។
ទំនាក់ទំនង ល្អជាមួយនឹងក្រសួងអប់រំ យុវជន និងកីឡា និងស្ថាប័នជំនាញក្នុងក្របខ័ណ្ឌឧត្តមសិក្សា។
- គណៈកម្មការទទួលស្គាល់គុណភាពអប់រំនៃកម្ពុជា៖ ទំនាក់ទំនងល្អជាមួយ និងបំពេញរាល់លក្ខខ័ណ្ឌរបស់ គណៈកម្មាធិការទទួលស្គាល់គុណភាពអប់រំនៃកម្ពុជា។
- គ្រឹះស្ថានឧត្តមសិក្សាក្នុងប្រទេស និងស្ថាប័នដ៏ទៃទៀត៖ សហប្រតិបត្តិការល្អជាមួយគ្រឹះស្ថានឧត្តម សិក្សាក្នុងប្រទេស និងស្ថាប័នដ៏ទៃទៀតដូចជា ក្រសួងពាក់ព័ន្ធ ក្រុមហ៊ុន អង្គការជាតិ និងអន្តរជាតិ។ល។
- សមាគមន៍គ្រឺះស្ថានឧត្តមសិក្សា៖ ជាសមាជិកសកម្ម និងចូលរួមនូវរាល់សកម្មភាពសង្គមផ្សេងៗ។
២. ស្ថាប័នក្រៅប្រទេស
- រក្សាកិច្ចសហប្រតិបត្តិការល្អជាមួយសាកលវិទ្យាល័យអន្តរជាតិជាដៃគូ៖
១- ប្រទេសអង់គ្លេសៈ St. Mary University College (SMUC)
២- ប្រទេសម៉ាឡេស៊ីៈ Open University Malaysia (OUM) និង Universityof Malaya (UM)
៣- ប្រទេសថៃៈ Dhurakij Pundit University (DPU) និងសាកលវិទ្យាល័យ
Bansamdejchoapraja Rajabhat University (BSRU)
- ពង្រីកដៃគូបន្ថែមនៅក្នុង៖
១- សហគមន៍អាស៊ាន និងប្រទេសក្នុងតំបន់អាស៊ី
២- សហគមន៍អឺរ៉ុប
៣- ឧបទ្វីបអូសេអានី
៤- សហរដ្ឋអាមេរិក
ខ. កម្មវិធីសិក្សា
- ស្របតាមក្រសួងអប់រំ យុវជន និងកីឡា និងគណៈកម្មការទទួលស្គាល់គុណភាពអប់រំនៃកម្ពុជា។
- មានមុខវិជ្ជាតម្រង់ទិសឆ្លើយតបនឹងតម្រូវការទីផ្សារក្នុងប្រទេស និងក្នុងតំបន់។
- ផ្តល់ការអនុវត្តជាក់ស្តែងដល់និស្សិត។
គ. ធនធានសាស្ត្រាចារ្យ
- ប្រកបដោយគុណវុឌ្ឍិ។
- ចម្រុះជាតិសាសន៍។
- មានសីលធម៌វិជ្ជាជីវៈ និងគរុកោសល្យល្អ។
ឃ. ហេដ្ឋារចនាសម្ព័ន្ធ និង ធនធានសម្ភារៈ
- ចំណតយានជំនិះធំទូលាយអាចផ្ទុកបានទោចក្រយាន និងទោចក្រយានយន្តរហូតដល់មួយម៉ឺនគ្រឿង និង រថយន្តរហូតដល់ប្រាំរយគ្រឿង។
- បន្ទប់សិក្សាធំទូលាយប្រកបដោយផាសុកភាព និងសម្ភារឧបទ្ទេសទំនើបៗ។
- បណ្ណាល័យបំពាក់ដោយឯកសារសិក្សាសម្បូរបែប។
- បន្ទប់ពិសោធន៍បំពាក់ដោយឧបករណ៍បច្ចេកវិទ្យាទំនើប។
ង. សេវាកម្ម
- ឥណទានសិក្សា។
- តាមដានការសិក្សារបស់និស្សិត និងទំនាក់ទំនងអាណាព្យាបាល។
- អាហារដ្ឋានប្រកបដោយអនាម័យខ្ពស់។
- ថតចម្លងឯកសារ។
- សង្រ្គោះបឋម។
- អនាម័យ។
ច. លើកទឹកចិត្ត
- ផ្តល់ប័ណ្ណសរសើរ។
- បញ្ចុះថ្លៃសិក្សាដល់និស្សិតឆ្នើម។
- ទស្សនកិច្ចសិក្សា។
